Projet Gordes — Correspondance du XVIe siècle

Monsieur, jay receu votre lettre du XIIIe et ne faictz doubte

que les ennemys se renforceans de gens comme ilz font

ne monstrent leur cœur plus gros, aussi bien quen

aultres lieux. Je suis bien marry du decès du sieur de La

Marcousse qui est bien grande perte et dommaige ; cest

ce que nous apporte ceste malheureuse guerre, et nay

non plus que vous aucune esperance que la conferance

qui se doibt faire à Beaucaire nous apporte aucun

amendement. Quant aux lettres surprises par ceulx

du Pousin, jay sceu de ceulx de ceste ville qui

escripvirent aucunes dicelles que la teneur estoit

de mesme advis quen aurez eu, si bien que celuy

qui le vous a donné le pourroit faire aussi daultres melheurs.

Je nay aultres nouvelles de nostre court depuis le

passage de monsieur de Vennes, sinon que quelquun ma

dict que le sieur de Guitery avoit parlé au roy assez

longuement au boys de Vincennes et que sur la fin

de ses propos sa majesté luy avoit monstré bon visage.

Lon ma dict aussi que lorage doibt tumber en

aultre lieu que de ce royaulme et que Dieu veueille. Javois

dernierement prié monsieur de Vennes dentendre quelque chose

pour mon particulier dont à sa commodité je seray bien aise

davoir ce que en aura sceu ; et en cest endroict luy baise

les mains, suppliant le Createur, après mes humbles

recommandations quil vous doinct,

monsieur, en parfaicte sancté et longue vye. De Lyon

ce XVIIe mars 1574

Votre plus afeccionné à vous fère servise

Mandelot

Consultation